"2012-жылдын мыкты футболчусу" наамынын ээси Азамат Байматов "Дордойдон" кетти

"Супер-Инфо" гезитинин тандоосу боюнча "2009-жылдын мыкты спортчусу" наамынын ээси, футбол боюнча КРнын улуттук курама командасынын коргоочусу жана капитаны Азамат Байматов "Дордойдун" курамында футбол ойноону токтоткондугун кабарлады. Бул тууралуу: "Келишим боюнча "Дордойдун" курамында ушул сезондун аягына чейин ойномокмун. Келишим аяктаганына байланыштуу командадан кеттим. Азыр эс алуудамын. Мага бир катар чет өлкөлүк командалардын кызыгып жатканынан кабарым бар. Азырынча кайсы клубдар экенин так айта албайм. Буюрса, баары Жаңы жылдан кийин билинет",- деди футболчу. Айта кетсек, Азамат Байматов быйыл 2-ирет КРнын Футбол федерациясы тарабынан "Жылдын мыкты футболчусу" деп табылды. Ал 2009-жылдан бери "Дордойдун" курамында 82 оюнда майданга чыгып, 35 гол киргизген. Ал эми улуттук курама команданын курамында 12 оюнда 1 жолу айырмаланган. Кыргызстандын 3 жолку чемпиону, 3 жолку Кубогунун ээси жана Суперкубогунун ээси. Ошондой эле Азамат "Вентспилстин" курамында Латвиянын вице-чемпиону болуп саналат.

Автор: Базарбек Абдураимов