Ош шаардык жаштар иштери боюнча комитети уюштурган долбоордун 14 катышуучусу Жогорку Кеңеште болуп кайтты

Ош шаардык жаштар иштери боюнча комитети уюштурган долбоордун 14 катышуучусу Жогорку Кеңеште практикада болуп кайтты. Бул тууралуу бүгүн, 19-декабрда аталган комитеттен билдиришти.

Маалыматка ылайык, Ош шаардык жаштар иштери боюнча комитети Ош шаарында мамлекеттик жаштар саясатын жүргүзүүдө жаштардын интеллектуалдык деңгээлин жогорулатуу, лидерлик сапаттарын өркүндөтүү максатында 2014-жылдын май айынан баштап "Интеллектуалдык өнүктүрүү мектеби" акысыз лидерлик окуу долбоорун уюштурган. Окуу долбоорунун алкагында 200 студенттин ичинен 40 студент сынактан өтүп, жыйынтыгында мыкты деп табылган 14 студент 7-декабрдан 13-декабрга чейин Кыргыз Республикасынын Жогорку Кеңешинде практикада болушту.

“Студенттер практика учурунда өз адистиги боюнча КРнын Жогорку Кеңешинин бөлүмдөрүндө тажрыйба топтошту. Андан сырткары Жогорку Кеңештин депутаттары менен жолугушуп, учурдагы маанилүү көйгөйлөрдү талкуулап, кеп-кеңештерин угушуп, студенттер үчүн бир топ жемиштүү практика болду”,- деп айтылат маалыматта.

Автор: Мальвина Уметбекова
Фото: Ош шаардык жаштар иштери боюнча комитет