Карганбек Самаков, Игорь Чудиновдун иши боюнча соттук отурум башка күнгө жылдырылды

262 гектар жер тилкесин мыйзамсыз трансформациялоо боюнча айыпталып жаткан Карганбек Самаков, Игорь Чудинов, Курманбек жана Жаныш Бакиевдердин иши боюнча соттук отурум айыпталып жаткандардын бири Эрнис Койчумановдун ооруп келбей калганына байланыштуу 25-августка жылдырылды.

Эскерте кетсек, буга чейин аталган ишти карап жаткан сот Чыңгыз Адамкуловдун ооруп калганына байланыштуу белгисиз мөөнөткө жылдырылып, иш башка сотко өткөрүлүп берилген.

Айта кетсек, Башкы прокуратура 2008-жылы Байтик, Лебединовка жана Кара-Жыгач айыл өкмөттөрүндөгү жер тилкелерин "Айыл чарба багытындагы жерлер" категориясынан "Калктуу конуштардын жерлери" категориясына которуу фактысы боюнча кылмыш ишин тергөөнү аяктап, ишти сотко жөнөткөн. Анда Карганбек Самаковго карата "коррупцияны уюштуруу", Жаныш Бакиевге жана Курманбек Бакиевге карата "коррупцияга көмөктөшүү", К.Самаковдун уулу Кубанычбек Самаковго жана алардын 4 адамына карата "коррупцияны кошо аткаруучулук" беренелери боюнча айыптар тагылган.

Өкмөттүн "КРнын Аламүдүн районунун аймагындагы жерлерди которуу жөнүндө" мыйзамсыз токтомун чыгарганы үчүн мурунку премьер-министр Игорь Чудиновго, мурунку биринчи вице-премьер-министр И.Айдаралиевге жана мурунку айыл чарба министри А.Ногоевге карата "кызматтык абалынан кыянаттык менен пайдалануу" беренеси боюнча айып тагылган.

Автор: Кенжебай Сатканалиев