Кыргызстанда аялзатына карата зордук-зомбулукка каршы күрөшүү боюнча 16 күндүк иш-чарага старт берилди

25-ноябрь - Аялдарга карата зордук-зомбулукту жоюу үчүн эл аралык күрөшүү күнүнө карата Кыргызстанда 16 күндүк кампания башталды. Иш-чара “Үйдөгү бейкутчулук жана тынчтыктан ааламдагы бейкутчулук жана тынчтыкка” урааны астында өтөт. Бул тууралуу бүгүн маалымат-жыйынында БУУнун КРдагы туруктуу координатору Александр Авенесов билдирди. Координатордун айтымында, өлкөбүздө гендердик теңсиздиктин айынан бала төрөөнү пландоону билбегендиктен, көптөгөн аялзаты оор турмушта жашайт. “Бизде бойго жете электерге карата зордук-зомбулук, эрте бойго бүтүү фактылары тууралуу маалыматтар бар. Айтор, бул тармакта маселе көп”,- дейт А.Авенесов. КРнын ИИМинин маалыматы боюнча, Бишкекте 1 айда үй-бүлөлүк чырлардан зыян тарткан 40-50 аял ооруканаларга жеткирилет, 2 миңге жакын айым зордуктоого кабылат. Ошондой эле Кыргызстандагы айымдардын 12 пайызы бойго жете электе турмуш жолуна аттанса, адам сатуу боюнча курмандыктардын 98 пайызын аялзаты түзөт.