"Ыйлап, калчылдап..." Камчы Көлбаевдин апасынын соту үйүндө өттү (видео)

Маркум кримтөбөл Камчы Көлбаевдин апасы Мая Алиеванын соттук иши өзү жашаган батирде өттү. Бул тууралуу анын жактоочусу Бактыбек Жумашев видео кайрылуусунда айтты.

Анын айтымында, Мая Алиеванын учурда абалы оор болуп, үйүндө жатат. Ал сотко бара албагандыктан, Октябрь райондук сотунун судьясы Мая Алиеванын батирине барып, көчмө соттук отурум өткөргөн.

"Судья Бегалиев эч нерсени карабай туруп, Мая Алиеванын үйүнө барып, ошол жерден соттук отурумду өткөрдү. Араң турган оорукчан адамды чоң стресске түшүрүштү. Ал колу калтырап, ыйлап, мындайча айтканда сот процесси эптеп-септеп эле өттү. Бул адамгерчиликке жатпайт да.

Сот иши мыйзам талабы менен өтүшү керек. Ошондуктан, урматтуу Садыр Нургожоевич, биздин укукту сактап беришиңизди суранабыз", - деди ал.

Жактоочунун айтымында, айыптоо корутундусунда 2008-жылдан 2022-жылга чейин легалдаштыруу мөөнөтү көрсөтүлгөн, ал эми тизмеде алар 1998-жылы сатып алган мүлктөр дагы бар экенин кошумчалаган.

Мая Алиевага "Кылмыштуу кирешелерди легалдаштыруу (адалдоо)" беренеси боюнча айып тагылууда.