Депутат Самаков садака берүүнү электрондук форматка өткөрүүнү сунуштады

Бүгүн, 17-декабрдагы Жогорку Кеңештин жыйынында Кубанычбек Самаков садака, зекеттен түшкөн акчаны электрондук форматка өткөрүү керектигин билдирди.

Анын айтымында, жарандар садакага берген акчасын кайда жумшалганын ачык түрдө көрүп турушса, садака берүүнүн саны көбөйөт.

"Садака, зекеттен түшкөн акчаны, алардын сарпталышын, муктаждыкка кетип жаткан акчаларды электрондук форматка өткөрсө болобу? Же болбосо канча акча түштү, кандай иштерге жумшалды деген маалыматтарды сиздер, өзүңүздөр жеке сайтыңыздарга чыгарып турсаңыздар. Себеби Кыргызстан, өзүңүздөр билгендей, санариптештирүү деп бардыгы электрондук форматка өтүп жатат. Жарандар баарын ачык-айрым көрүп жатса, муфтиятка ишеним көбүрөөк артып, садака берүүнүн дагы саны өсмөк. Анан дагы садака берүүнү онлайн форматка дагы өткөрсөк жакшы болмок", - деди депутат.

Ал эми муфтий Абдулазиз Закиров садакадан түшкөн ар бир акчанын отчёту бар экенин айтты. Ошондой эле учурда садаканы онлайн түрдө төлөө каралып жатканын билдирип өттү.