Такыр-Төр көлүнүн кесепеттерин алдын алууга 76 адам тартылды

Бүгүн, 29-июнда Такыр-Төр көлүнөн агып жаткан суунун көлөмү секундасына 2-3 метр кубду түзүүдө. Бул тууралуу Өзгөчө кырдаалдар министрлигинен билдиришти.

Маалым болгондой, тоо көлүнүн абалын байкоого ӨКМдин Чүй облусу боюнча башкармалыгынын башчысы, Өзгөчө кырдаалга мониторинг жана божомолдоо жүргүзүү департаментинен 1 кызматкер, Улуттук илимдер академиясынан 1 кызматкер жеринде аэровизуалдык байкоо жүргүзүүдө.

Ал эми унаа жолду, көпүрөнү жана сел өтүүчү каналды калыбына келтирүү иштерине ӨКМден 17 кызматкер, 3 техника жана жол тейлөө ишканаларына 5 техника жеке менчик 2 экскаватор, ИИМден 40, жергиликтүү бийликтен 19 кызматкер, жалпы 76 адам, 12 техника тартылган.

Эске салсак, 27-июнь күнү Ысык-Ата районундагы Такыр-Төр бийик тоолуу көлү жырылып, Алмалуу, Горная Серафимовка, Нижняя Серафимовка айылдарын аралап өтүп, Алмалуу айылында 1 көпүрөнү агызып, жол жабылган. Ошондой эле Бишкек–Кой-Таш–Ысык-Ата унаа жолуна, дачаларды, көпүрөлөрдү, жана карылар үйүнүн суу дарбазасын каптап кетүү коркунучун жараткан.

Буга байланыштуу өзгөчө кырдаалды жоюу максатында 28-июнь күнү Ысык-Ата райондук администрация тарабынан райондун аймагына “Өзгөчө кырдаал” режими киргизилген.

Автор: Ширин Марат кызы