Барселона туристтердин агымын азайтуу үчүн эки круиздик терминалды жабат

Барселона шаардык кеңеши менен түзүлгөн белгилүү келишимге ылайык, шаардагы эки круиздик терминал жабылат. Бул тууралуу CNN агенттиги билдирди.

Келишимде круиздик лайнерлерден түшкөн жүргүнчүлөрдүн шаар ичинде кантип жүрөрүн иликтеген изилдөөгө каржылык колдоо көрсөтүү да каралган. Шаардык кеңеш бул аракетти туруктуу транспорттук мобилдүүлүк планын түзүүгө карай алгачкы кадам катары баалоодо.

Мындан тышкары, келишим порт инфратүзүмүн жаңыртууну да камтыйт. Бул аркылуу круиздик операцияларды экологиялык жактан таза жүргүзүү мүмкүнчүлүгү жаралат. Мисалы, кемелер токтоп турганда электр энергиясын жээктеги булактан алып, кыймылдаткычтарын өчүрө алышат. Бул болсо зыяндуу газдардын бөлүнүшүн азайтат. Кеңештин маалыматына караганда, бул жалпы план 185 миллион евро (216 миллион доллар) көлөмүндөгү мамлекеттик-жеке инвестицияны талап кылат.

Бул чаралар Барселонадагы ашыкча туризмдин басымын азайтуу боюнча кеңири аракеттердин бир бөлүгү болуп саналат. Акыркы жылдары жергиликтүү жашоочулар туристтерге каршы пикирде болуп, 2024-жылдын июль айында туристтерге суу тапанчадан суу чачылган нааразылык акциясы дүйнөгө тарап кеткен.

Шаардыктар ашыкча эл топтолгонуна жана туристтерге ижарага берилген батирлердин көбөйүшүнөн улам жеткиликтүү турак жайдын тартыштыгына даттанышууда.

2024-жылы Барселонанын портуна - Европадагы эң ири круиздик портко - 1,6 миллион транзиттик жүргүнчү келген.

Барселона Туризм Консорциумунун март айындагы билдирүүсүнө ылайык, туристтердин басымдуу бөлүгү эртең менен жээкке түшүп, шаардын кооз жерлерин кыдырып, кечке жуук кайра кемеге кайтып кетишет.

Автор: Жазгүл Жаңыбаева