Өлкөдө биометрикалык паспортторго өтүү июль айында башталары күтүлүүдө

Биометрикалык паспортторго өтүү июль айында башталары пландалууда. Бул тууралуу бүгүн, 26-январда Мамлекеттик каттоо кызматынын жыйынында вице-премьер-министр Олег Панкратов билдирди.

Анын айтымында, президентти шайлоого жарандардын биометрикалык паспорттору менен катышуусу үчүн электрондук паспортторго өтүү процесси 2017-жылга чейин аякташы керек. "Учурда заманбап маалыматтык технологияларды колдонуу багытында иш жүргүзүлүүдө. Бүгүнкү күндө биз үчүн эң маанилүү багыттар - өлкөнүн калкынын бирдиктүү каттоо тизмесин түзүү жана биометрикалык паспортторго өтүү",- деди Панкратов.

Айта кетсек, 19-январда президент Алмазбек Атамбаев Мамлекеттик каттоо кызматынын төрагасы Тайырбек Сарпашевди кабыл алган. Жолугушууда Сарпашев жарандардын биометрикалык маалыматтарын чогултуунун уланышы, өлкөдө биометрикалык паспортторду киргизүү аракеттери жөнүндө айтып берген.

Автор: Нургазы Аматов