Кыргызстандык кикбоксчулар Бразилияда өтүүчү Дүйнө
чемпиондугуна федерациянын ичиндеги алдамчылыктан улам катыша албай калды. Бул
тууралуу кикбоксчу Мирбек Сүйүмбаев билдирет. Айтымында, Бразилияда өтүүчү
Дүйнө чемпиондугуна Кыргызстандан 18 спортчу катышмак. Алардын 12си Кикбокс
федерациясына аталган мелдешке катышуу үчүн демөөрчүлөрдүн жардамы менен 3500 доллар чогултуп беришкен, калган 6 спортчуга башкы машыктыруучу
Александр Воинов өзү төлөмөк болгон. Чогултулган сумманын ичинде жатакана, авиабилет
баары кирет деп айтылган экен. Федерациядан спортчуларга Бишкек-Стамбул-Сан-Паулу
багыты боюнча билеттер даярдалганын айткан. Бирок мелдешке аттанар алдында учууга билеттер Бишкектен эмес, Алматыдан алынганы белгилүү болуптур. Александр Воинов
болсо каражат тапса барарын айткан.
“18 кикбоксчу Алматыга барганыбызда эч
кандай билеттер даяр эмес болуп, кайрадан Бишкекке келдик. Федерацияга
кайрылсак, билеттер убагында алынбаганына Түркия тарап күнөөлүү экенин, акчалар билеттерди алдын ала алуу үчүн Талант Сүйүмбаев аттуу жигитке өткөрүлүп берилгенин айтты. Спортчулар
билеттерди талап кылып, Түркияга барууга даяр экенин айтып, ал жакка бардык.
Бизди Талант Сүйүмбаевдин достору тосуп, жатаканага жайгаштырды. Талант
Сүйүмбаев өзү жок экен. Стамбулда бизге алынган билеттер баасы 1700 доллар турган Стамбул-Сан-Паулу багытында
эмес, 70 доллар болгон Стамбул-Анкара багытына алынганын билдик. Талант Сүйүмбаев менен
байланышсак, эч кандай акча ала электигин, акча КРнын Кикбокс федерациясында экенин айтты.
Кыргызстандык спортчулар толук курамы менен Түркияда каржысы жок калып, жардам
сурап Стамбулдагы кыргыз элчилигине кайрылсак, 2 күнгө жатакана таап беришти. Андан
кийин Талант Сүйүмбаевдин тууганы 12 спортчуга Бишкекке билет алып берди. Бишкекке
келип Александр Воиновдон акчабызды сурасак, "акча менде эмес" деди. Кайрадан Талант Сүйүмбаев
менен байланышсак, кечирим сурап, акчаны кайрып берерин айтты. Бир апта өттү, акчабызды кайтара элек. Эң башкысы, Кыргызстан үчүн медаль алууга мүмкүнчүлүк болгон Дүйнө чемпиондугуна катыша албай калдык”,- дейт Мирбек
Сүйүмбаев.
