Жергиликтүү кеңешке шайлоо: Бүгүн талапкерлерди каттоонун акыркы күнү

Бүгүн, 17-октябрь айылдык кеңештерге шайлоого талапкерлердин документтерин кабыл алуунун акыркы күнү. Бул жөнүндө Борбордук шайлоо комиссиясынын маалыматында айтылат.

Билдирүүгө караганда, айылдык кеңештердин депутаттыгына талапкерлерди көрсөтүү 17-октябрь саат 18:00гө чейин жүргүзүлөт.

Республика боюнча жалпысынан 1259 шайлоо округундагы 231 айылдык кеңешке шайлоо белгиленген. Мандаттардын жалпы саны 5391.

Белгилей кетсек, жергиликтүү кеңештин депутаттарын шайлоо 17-ноябрда өтөт. 6-сентябрда президент Садыр Жапаров "Жергиликтүү кеңештерди таркатуу жана жергиликтүү кеңештердин депутаттарын шайлоону дайындоо жөнүндө" жарлыкка кол койгону маалым болгон. Ал эми жергиликтүү кеңештин депутаттары аймактарда жана шаарларда административдик-аймактык реформанын жүргүзүлүшүнө байланыштуу таркатылган. Ага жалпы мамлекеттик бюджеттен 495 миллион 718 миң 400 сом жумшалат.

Автор: Айжанар Рыспек кызы
Фото: Интернеттен алынды