Өрттөөчү курал катары каралган "Молотов коктейлине" тыюу салуу демилгеси талкууланууда

Бүгүн, 30-мартта парламенттин Коргоо жана коопсуздук боюнча комитетинин жыйынында күйгүзүүчү, ок атуучу куралдар боюнча мыйзам долбоору каралды. Демилгечи ИИМдин башчысынын орун басары Рыскулбек Жапаркуловдун айтымында, бул долбоор менен өлкөдө айрым күйгүзүүчү куралдарга тыюу салуу демилгеленүүдө.

Депутат Исмаил Исаков мындай демилгени сынга алды. "Менин түшүнүгүм боюнча, силер адамды "Молотов коктейли" куралын колдонгондугу үчүн камакка алууну демилгелеп жатасыңар. Бирок фейерверк деле күйгүзүүчү заттар да. Демек, салют аттырган жаран камакка алынат. Бул туура эмес. Мыйзам долбоорун кайрадан оңдоп чыгыш керек",- деп кайрылды демилгечилерге Исаков.

Башка депутат Курмантай Абдиев демилгечилердин долбоору кыргыз жана орус тилинде айырма менен жазылгандыгы үчүн өкмөткө сын айтты.

Жыйынтыгында парламент комитети мыйзам долбоорун кароону кийинки аптага жылдырды.

Автор: Нургазы Аматов
Фото: Нургазы Аматов