Өлкөдөгү Архив агенттигинин ишин оптимизациялоо маселеси боюнча жыйын өттү

Бүгүн, 25-ноябрда премьер-министр Темир Сариев өкмөткө караштуу Мамлекеттик каттоо кызматынын алдындагы Архив агенттигинин ишин оптимизациялоо маселеси боюнча жыйын өткөрдү.

Маалыматка караганда, Архив агенттигинин тутумунда 65 архив иштейт, анда 1831-жылдан азыркы учурга дейре жалпысынан 4 миллион 300 миң кагаз документ сакталат. Анда сакталган документтердин көлөмү жыл сайын жогорулап, бүгүнкү күндө 18 архивде гана кошумча резервдер каралса, калган 47 архив 100 пайызга толгон.

Буга байланыштуу өкмөт башчы Каржы министрлигине 2016-жылга карата республикалык бюджеттен каржылануучу “капиталдык курулуш” беренеси боюнча курулчу объектилердин тизмесин кароодо Архив агенттигинин беш имаратын куруп, оңдоого каражат кароону тапшырды.

"Биз архив жана музейлердеги кыргыздар, мамлекетибиз тууралуу документ жана материалдарды сактоо үчүн тийиштүү шарттарды түзүүбүз зарыл. Мындан тышкары электрондук өкмөттү ишке киргизүү үчүн электрондук архив болуусу керек, демек, бардык архивдик материалдар санариптик форматка өткөрүлүүсү зарыл. Ошондуктан Тышкы иштер министрлигине, Каржы министрлигине жана Экономика министрлигине Архив агенттигин өнүктүрүү жана архивдик документтерди санарипке өткөрүү борборун түзүү боюнча концепцияны ишке ашыруу үчүн донордук каражат издөө боюнча иш жүргүзүү тапшырмасын берем",- деди Сариев. Ошондой эле Мамлекеттик каттоо кызматына 2015-2019-жылдарга Архив агенттигин өнүктүрүү боюнча деталдык план иштеп чыгып, бекитүү тапшырмасын берди.

Автор: Айпери Ганыжан кызы