SUPER.KG порталынын "Поэтерапия" рубрикасында бул жолу жаш калемгер Сабира Шейшекеева ырларынын жаралуу тарыхы тууралуу баяндап бермекчи.
Сабира Шейшекеева Нарын облусунун Жумгал районундагы Чаек айылында 1989-жылы 5-апрелде жарык дүйнөгө келген. Каракол шаарындагы Касым Тыныстанов атындагы университетинин филология бөлүмүн аяктаган. Мындан сырткары Кыргыз мамлекеттик курулуш, транспорт жана архитектура университетинде курулуш багыты боюнча сырттан окуу бөлүмүн бүтүргөн. Президенттин алдындагы улуттук тил комиссиясынын "Кыргыз тили" төш белгиси, "Янги Овоз" эл аралык жазуучулар союзунун "Мыкты калемгер" төш белгиси жана көптөгөн мамлекеттик сыйлыктардын ээси.
"Жан дүйнөм жаңырыгы ырларым", бөбөктөр үчүн "Бөбөктөргө ыр десте", "Поэзия түрмөктөрү" китептеринин автору. Үй-бүлөлүү, үч уулдун энеси.
***
Күрөшүп түйшүк менен турмуштагы,
Пайдубалын жашоонун тургузбады.
Канча адам бул тагдырды басып өткөн,
Айтып турат жүзүндөгү бырыштары.
Тырмышып чокусуна чыкчудай эхх,
Ар ишке күндөн күнгө умтулабыз.
Түбү жок акырына жете албай,
Адамзат акырындан кырылабыз.
Аттигиң барарыбыз көрдүн ичи,
Кара жер кучагына камтып алат.
Ээрчитпей ата-энеңди, тууганыңды,
Ажал келсе жаныңды жалгыз алат.
Биримдик ыроолосо ортобузду,
Душмандар чабуулун кантип жасайт?
Эгерде баркын билсек асылдардын,
Көңүлдөр көккө учуп, жаркып барат.
Асманда күн мээримин төгүп турса,
Тирүүлүк жандангандай өңүн салат.
Эң жогорку мамиледен сага арналган,
Көңүл толуп, бул жашоодон моокум канат.
Кечирим дарысы го жүрөк дарттын,
Айыкса да, а бирок тагы калат.
Андыктан келгилечи асылдарым,
Сый-урматта өтөлүчү өмүр улап.
Андыктан келгилечи асылдарым,
Сыйлашалы, тирүүлүктө өмүр кымбат.
Бул ыр бутума операция жасатып, үйдө жаткан кезде жазылган. Жалгыздыкта адам көп ойлонот эмеспи, ошол кезде ар кыл ой курчап, адамдардын бири-бирине болгон мамилеси, жүрүм-турумун ыр саптарымда чагылдырууга аракет кылгам. Алты саның аман кезде ары чуркап, бери чуркап жумушуңду жасап, иштеп жүрө бересиң да. Ошол эле учурда башыңа мүшкүл иш түшкөндө отуруп ойлонуп, жашоону таразалаган кез келет экен. Ошондой учурда жазылган ыр.
Учурдун ыры
Онлайн окуп, камерадан эч түшпөй,
Бирде сүрөт, бирде видео биз жүктөп.
Окуу жылы аягында бардыгы,
Калышаттыр журналисттей тың сүйлөп.
Эркин сүйлөп, оюн топтоп ар бири,
Колду жаңсап, камерадан тартынбай.
Мугалими мактап койсо шыктанып,
Атаандашып бири-биринен калышпай.
Тайпалардан көрүп кол жазманы,
Сулуулашып өздөрү эле оңдонот.
Эжейине жагынууга ар бири,
Шашылышат, аң сезими ойгонот.
Таза, тунук балалыктын сезими,
Алдоо гана ар бирине жарашат.
Мактап анан сүрөп турса ата-эне,
Бала дагы окуу үчүн тырышат.
Келечектин эркин кушун таптайлы,
Бийик учсун, ата-энелер какпайлы!
Көмөк берип, биз балдарды жетелеп,
Аракетин ар баланын барктайлы!
Бул ырдын тарыхына токтоло өтсөм. Былтыр карантин башталган маалда, балдар онлайн окуп калганда алгач балдар камерадан тартынып, окуй албай, ыңгайсыздыктар жаралып баштаган болчу.
Менин үч уулум бар. Алардын экөө мектепте окуйт. Кыз бала өжөр болот да эркек балдарга салыштырмалуу. Эки балама алгач кыйын болуп баштаган. Андан соң видео менен иштегенди үйрөнүп, онлайн окууга көнүп калышты. Көпчүлүк балдарда эле ушундай абалга туш болушту окшойт. Жылдын аягында балдар видеодо ойлорун эркин айтып баштаганы байкалды. Мына ошондо жазылган ыр болчу.
Апакем аман бар үчүн....
Жашоону сүйөм апакем аман бар үчүн,
Жан үрөп дайым балдары үчүн иштеген.
Мээримин төгүп небере, уул, кыз, келинге,
Түндүгүн үйдүн тээ бийикке көтөргөн.
Турмушту сүйөм, болсо да оор, жеңили,
Туура багыт тандоону апам көрсөткөн.
Тагдырдын оор талашсыз ушу сыноосун,
Кеңеши менен апакем бар бөксөрткөн.
Ааламды сүйөм, буркурайт жыты апамдын,
Жел менен учуп, абага сиңип кеткендей.
Кай жерге барсам дем-күчүм болуп ар убак,
Салкын жел сылап, жүзүмөн апам өпкөндөй.
Кызматым сүйөм, ак эмгек артып элиме,
Апамдай иштейм, маңдай терим төккүчө.
Адал эмгек артында дөөлөт карылык,
Жараткан берсин турмуштан көзүм өткүчө.
Жашоону сүйөм апакем аман бар үчүн,
Сагынып кетем жанына жетип өпкүчө.
Биз үй-бүлөдө жети бир тууганбыз. Мен эң кичүүсүмүн. Апам ар дайым элпек анан эмгекчил. Бизди дагы ар убак ак эмгекке, кичи пейилдикке жана үй-бүлөдө бири-бирибизге көмөктөшүүгө тарбиялап келген. Апама болгон сый-урматымды, сүйүүмдү ушул ырда арнагам десем дагы болот.
