SUPER.KG порталынын "Поэтерапия" рубрикасынын бул жолку каарманы Айтолкун Мухамедимин кызы болду.
Айтолкун Мухамедимин кызы 1992-жылы Жалал-Абад облусунун Токтогул районуна караштуу Терек-Суу айылында жарык дүйнөгө келген. Орто билимдүү, "Поэзия Ордосу" көркөм адабий коомдук бирикмесинин мүчөсү. Үй-бүлөлүү, эки уулдун энеси.
МЕЗГИЛ
Шашпа мезгил,
Шамал сымал ызылдап,
Тынчым алба,
Тырмап жүрөк тызылдап.
Сенин жыргал,
Сыйкырыңдан арылбай,
Тирүүлүктү,
Түгөткүм жок чырылдап.
Токто мезгил,
Таба электе жолумду,
Жула качпа,
Жылуулукту, сонунду.
Алды жакта,
Алда канча жыргал бар,
Тоскоол болбо,
Тоспо мага жонуңду.
Укчу мезгил,
Угуп турчу жөнүмдү,
Бырчалаба,
Бырыш кылба өңүмдү.
Ансыз деле,
Алсыз болуп акырын,
Карылыка,
Баш багабыз төгүнбү?
Кетпе мезгил,
Келечегим шаштырба,
Жеңдим дебе,
Жеңилүүгө азгырба.
Чаң-тополоң,
Салып коюп дүйнөмө,
Чыргоолонбо,
Чачымды ак бастырба.
Бул ырым жакында эле айылыма барганда жазылган. Балалыгым өткөн үйдө отуруп, ошол биз ойногон үйдө биздин балдарыбыз ойноп калганына көзүм тоюп карагам. Бирок мезгилдин тез эле алмашып, жаштыгыбыз жылдарга жашынып жатканына, убакыттын тез эле өтүп кеткенине бир аз кейидим. Ошондон жаралган ыр десем болот.
ОЙ ТОЛГОО
Бир өмүр өтөт балким, башы бар аягы жок,
Жеткирбей карылыкка колунда таягы жок.
Артымда эмне калат, бар санаам ушул азыр,
Эмне дейт мен жөнүндө эки ооз баяны жок?
Тирүүлүк кетет мүмкүн бүгүн бар, эртеңи жок,
Арылбай түйшүктөрдөн ченеми, мерчеми жок.
Калтырам эмнелерди, айталам эмнелерди,
Угууга кимдер куштар, жашоомду көркөмү жок?
Бир күнү келет ажал эскертүү, аяны жок,
Жоготот жер үстүнөн аёосу, карамы жок.
Качандыр бир күндөрү жарыкты таштап анан,
Баш багам караңгыга калеми, барагы жок.
Кантейин өлүм келет, эскертүү аяны жок,
Куу турмуш өтө берет, башы да аягы жок.
Калгандар жер үстүндө жашаган, жашай берет,
Бир учур мен жок болом, эстөөгө баягы жок.
Бир күнү мен жок болом, кабары, карааны жок.
Бул ырымды бир жыл мурун таң эрте метродо кетип бара жатып жазгам. Ар кандай кырсыктарды угуп-көрүп жүрүп ажал айттырбай келерин, кайсы бир күнү мен дагы башкалар сыяктуу эле жер үстүндө жок болорум анык экенин ойлодум.
САРЫ КИШИ
( Атамдын элесине)
Кең пейил, таза жүрөк сүйкүм жүзү,
Керемет устачылык кылган иши.
Кабагы бат бүркөлүп, бат жазылган,
Көчөгө чыкпай калды Сары киши.
Коңшулар кобурашып турган кезде,
Кошулуп укпай калды Сары киши.
Бош сыңар муздак тартып үйдүн ичи,
Бозортот жакындарын ыйдын күчү.
Бапырап баягыдай балдарына,
Батасын бербей калды Сары киши,
Буулугуп ыйласак да сагынычтан,
Бурулуп келбей калды Сары киши.
Ойлонтпой өмүрүнүн келип күзү,
Олтурган, турган жерде калып изи.
Онтоткон ойлорунан чарчады го,
Ойгонбой кете берди Сары киши,
Ооматсыз бул жашоодон тажады го,
Оо дүйнө кете берди Сары киши.
Өмүрдө өкүтү күч күйүп ичи,
Өкүнүп ырлар жазат калем учу.
Өзөгүм өрттөп жалын каптап жатат,
Өзгөчө жан кутманым Сары киши.
Өзүңдөй балдарың бар аркаңдагы,
Өкүнбөй тынч уктагын Сары киши.
Асмандан нур төгүлүп кабырыңа,
Ар убак Бейиште жүр Сары киши.
Бул "Сары киши" аттуу ырым ушул жылы мезгилсиз дүйнөдөн өтүп кеткен, маркум атамдын жаркын элесине арнап, күйүттөн жазылган ыр десем болот. Атам мени "сары кызым" деп эркелетип, жакшы көргөндүктөн мен дагы аны сары киши деп атагым келди. Атаң башкалар үчүн мейли жаман, мейли жакшы, кандай адам болбосун, сен үчүн ар убак бийик, ар убак биринчи орунда турары чын. Өкүнүчүм күч, бейиштен жай берсин деп кала бердим.
БҮГҮН МЕН ЖОЛГО ЧЫКТЫМ
Бүгүн мен жолго чыктым,
Сагыныч, кусалыкты жыйнап алып,
Атамды, айылды эстеп ыйлап алып.
Көкүрөк көптү туюп турса дагы,
Жүрөгүм бир булкунуп туйлап алып.
Бүгүн мен жолго чыктым,
Үзүлгөн үмүттөрдү улап алып,
Чачылган кыялдарды курап алып.
Күткөндөр бар экени кубандырып,
Кудайдан амандыгын сурап алып.
Бүгүн мен жолго чыктым,
Багытым, мекенимди беттеп алып,
Бакубат бар жашоомду эстеп алып
Түгөнбөс түйшүктөрдү жыйыштырдым,
Көр турмуш көйгөйлөрүн четке кагып.
Бүгүн мен жолго чыктым,
Көңүлүм көксөп көктү карап алып,
Сагынган күндөрүмдү санап алып.
Күткүлө бүгүн мына бара жатам,
Бактылуу күлкүңөрдү самап алып.
Мен дагы эл катары Орусия жергесинде мигрант болуп иштеп жүрдүм. Кыргызстанга жолго чыкканымда толкунданып, көңүлүм көккө учуп, өзүнчө таттуу кыялдарга чулганып жазган ырым.
